Sunayi Kis Ne Ye Zindaan Mei – Mir Hasan Mir 2003-04

Sunayi kis ne ye zindaan mei loree Sakina so rahi hai

Sunayi kis ne ye zindaan mei loree Sakina so rahi hai
Khudara zor se bolay na koi Sakina so rahi hai

Sunayi kis ne ye…

Kaha Bano ne utho Shahzaadi
Huwi kya baat kyun maadar se roothi
Utho Baba ka sar aaya hai bibi (x2)
Magar zindaa’n ki har deewaar boli
Sakina so rahi hai

Sunayi kis ne ye…

Tumharay goshwaray mil gaye hain
Dar-e-zindaan saaray khul gaye hain
Rihaayi mil gayi jaati hoon ghar ko (x2)
Magar Sajjad ki awaaz aayi
Sakina so rahi hai

Sunayi kis ne ye…

Na ab maray ga koi bhi tamaachay
Na hongay phir se ye rukhsaar neelay
Gala baandha na jaayega rasand mein (x2)
Jo aaya shimr to us se kahoongi
Sakina so rahi hai

Sunayi kis ne ye zindaan mei lori…

Rida choti si ik sar par udha doo
Chalo Abbas se tum ko mila doo
Tumhari mashq hai or un ka seena (x2)
Jo dekha aasma kehta hai wo bhi
Sakina so rahi hai

Sunayi kis ne ye…

Rasand ka zakhm ashko se dhula doo
Tere baalon se ye mitti chhudha doo
Tere talwo ke chhalo ki dawa doo (x2)
Ajal boli ke ye kaisay chalay gi
Sakina so rahi hai

Sunayi kis ne ye…

Huay jab shaam ke saaye bhi gehray
Parinday chehchahatay jaa rahe thay
Kaha Bano ne aye udhtay parindo (x2)
Sadaayein rok lo kuch der apni
Sakina so rahi hai

Sunayi kis ne ye…

Bananay qabr jab Sajjad uthay
To wo naad-e-Ali dohra rahay thay
Bandhay haatho se chaha qabr khodein (x2)
Achanak paaon ki zanjeer boli
Sakina so rahi hai

Sunayi kis ne ye…

Andhera roya sannatay se mil kar
Falak girnay laga dharti ke upar
Hilaanay par bhi jab bachhi na jaagi (x2)
To boli ye fizaaon ki khamoshi
Sakina so rahi hai

Sunayi kis ne ye…

Adab ki jaa hai ye Rehan dekho
Buland awaaz mei hargiz na bolo
Yahan to fateha bhi dheere padhna (x2)
Yahan awaaz ho jaaye na oonchi
Sakina so rahi hai
Sunayi kis ne ye zindaan mein loree Sakina so rahi hai

Khudara zor se bolay na koi
Sakina so rahi hai

Sunayi kis ne ye zindaan mein loree Sakina so rahi hai

Check out other Noha from Mir Hasan Mir:
https://www.abulhasanlakhani.com/category/noha/mir-hasan-mir/

Mir Hasan Mir’s YouTube channel:
https://www.youtube.com/MirHasanMir